Takatut/ Ussan n ṭṭrad

 

Yuli wass mi d kcemen lɛesker ɣer taddart, ur ǧǧin ulla d yiwen ad yeffeɣ .Imsewwqen gezmen-asen abrid deg “teblaḍin” imeksawen yebran rran-ten-id ɣer ufrag n tala, gan tajlibt din. Seg yall tama id keccemen lɛesker amzun d aweṭṭuf.

Mi gan tubrint i taddart , tarbaɛt tameqqrant tuɣ abrid n tezribt n ufella.Ur unifen akin neɣ akka, Abrid-nsen yiwen.

Mi wweḍen sdat uxxam n nna Feṭṭa, zzin-as lɛesker-nni s yall tama, seg tezribt n ufella,  d tebḥirt n tɣeddiwt , seg ugadir n ḥmed, deg yiwet n tegnit , afrag-nni n Feṭṭa yeččur-d d lɛesker, d alaf i  yedduklen ɣer din, zwaren rẓan tawwurt n ufrag, rnan tin n uxxam, kecmen tasga,  cudden nna Feṭṭa akked Yamina.

Tarbaɛt-nni n lɛesker tebḍa ɣef sin: wid yeṭṭfen abeckiḍ , afusnsen ɣef zznad akked wid d-yessufuɣen ɣer ufrag ayen akk yellan deg uxxam-nni , ur telli trusi s leḥder, d aḍegger akkin, , d aceṭṭiḍ neɣ d afexxar. Axxam-nni yeqqim d ilem.

Taggara, kecmen sin n yiɛekriyen, agelzim  gar yifassen , kkren-as d ahuddu i  wuxxam, ɣzan agens , addaynin, adekkan, d win yellan yeqqaz deffir tewwurt i d-isuɣen d amezwaru:

   _ Uhhhh ala ala ! d ifri n ɛli baba !

Send ad kecmen wid yellan deg ufrag, winna yessufuɣ-d ayen deg tesraft-nni: iceṭṭiḍen n minitir, isebbaḍen n buṭugas iqeflen , tibwaḍin n ddwa , snat n tɛellamin  n wayyur d yitri…

Ur zzin lɛesker-nni aṭas deg ufrag , mi wwin  nna Feṭṭa akked Yamina, skecmen-tent akken ttwacuddent ɣer utemmu n Rabeḥ yellan deg Tmazirt Usammer , syin sduklen at taddart sdat uɛecciw-nni , mi yessuli awal-is lqebṭan-nni, syin yerna treǧman yessewzel aseglef-is, yiwen n uɛsekriw yessaɣ-as times i utemmu-nni , cwiṭ kan, yewweḍ uḥeǧǧaǧu n tmes s igenni.

Mi yettali waggu ɣer yigenni, imezdaɣ n taddart ẓẓan allen-nsen deg tmes –nni, lɛesker ɛussen-ten , afus ɣef zznad, win yembawlen ad t-yečč rrṣaṣ.

Mi yeffeɣ lɛesker seg taddart , ur nufin ayen ara meṭel, deg yiɣed n utemmu yeggra-d uceṭṭiḍ n tqendurt-nni tubart n  nna Feṭṭa akked tezweɣ n tesfifin n Yamina.

At taddart sduklen iɣeden n nna Feṭṭa d win n Yamina deg yiwen n uẓekka, tasdukel-itent tmeddurt, tesdukel-itent taggara.

                                                                                 

 

Yetwaks-d deg iḍrisen n ɛumer u lamara.

 

 

 

 

Aucun évènement dans le calendrier
Dim Lun Mar Mer Jeu Ven Sam
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30